القصيدة التي طلبتها شمس الأغنيه

بكّير قبل النّصر في قامِه هوت
في رمح مال وع جزع أرزه تكي
بإيدو ومى للشمس تينام انتفض
والجرح باس تراب أرض المعركِه
***
وبوز البارودي لكان بيزلغط سكت
لا عاد غنى ولا طلع منّو حكي
ولمّا العين ع غفوة عيونو بكت
ردّ الجرح بالصّوت: ممنوع البكي!
***
ممنوع بوز البارودي يخرس من الصّوت
يصقّع ويبرم وما تطالا ايد
في ألف ايد بتعرف تذلّ الموت
بتنمدّ ليها بترجع من جديد
تزلعط بأيدين اللي حاملها
تكتب حكاية نصر أولها
بيسقط شهيد مناخد بطار الشّهيد ...
***
وهيك النّصر ع صفحة المجد انكتب
والحبر حبر جروحكن انتو
واللّون بدله المرقطه بلون التّعب
انتو الخميره بأرضنا صرتوا

مين قال خلصت حربكن صرتوا ارز مزروع
بلّش العزّ بموتكن صرتوا علم مرفوع
تعلّوا تعلّوا بعد اعلى من الممنوع
دقّوا براس المجد وكفّوا الطّريق طلوع ...
***
ضيّعت صوتي انا وعيّطلكن
أخّرت موتي تلاقي متلكن

حملت كمشه من تراب
وصرت عم احكي معا
حسّيت قلبا داب
سألتها شو بيوجعا

تاري الوجه من قبلكن
يوم اللي كانوا أهلكن
من دون كيف وليش
ما يسألوا اديش
ولك تكرم عيونو الجيش
لفّة علم لابقتلكن